Der Attersee

G’soffn und g’fressn haums, d’Frandsosn, wias ds’Kemading woan. Und d’Leid an Dåf san hoiwads dahungad dawäu. Und in oan fo de Baunaheisa haum d’Soidådn gauns bsundas wüd umg’hausd. Wås åwa ned g’wissd haum, is, das de oid Beirin a Heggs g’wen is. Damids a weng a Rua gem, håds eana a guads Essn faschbrocha. Und glei san d’Frandsosn wia de Lambbe a da farauggnd Schdum g’sessn. De Oide håd an Ofn eig’hoadsd und iagndwås dadsu bräamed. Af oamoi san a Bofi schwoidse Sau bei da Dia einag’rennd und haum dson Daunddsn und Grunddsn aug’faungd. De Oide håd daun a Bfaun g’numa und håd um Fresch dson Schrei aug’faungd. De han a glei a d’Kuchi einag’hubbfd und haum a Schmoids a d’Bfaun eineg’schbuggd. Då is a de Frandsons schia augaunga und se san ois a hungrege dafaug’rennd.

Seewalchen am Attersee

D’Seewoia is amoi a Mau g’wen, dea håds a sein Lem min Schboan und mid seina Gia dso ana gaunddsn Drui foi Goid bråchd. Wira åwa g’schbiad håd, das mid eam nimma laung ge wiad, da håd a de Drui midn Goid drinan an Woid eig‘råm. Und damids jå neamd findd, håd a an Schlissl dso da Drui a nu fagråm. Ea håd hoid neamd des Gäd fagunnd. Und boid draf is a daun ga g’schdoam.

Und wias hoid amoi so is a de Wäuda, haum se agradding a boa Leid faiad. Wias an Weg so suachan, då segn ses af oamoi gauns råd leichddn a de Schdauna. Då is a Mau middn an Feir g’schaundn und håd g’woad und g’schrian: „Mei Gäd, des wås i aus de oama Leid aussabressd hau, is då an Woid fagråm. Und fia mia gibds ned endda a Rua, ois bis wea des Gäd g’funddn und indda de Bedla fadeud håd. Nemds an Schlissl, den i schau g’fundn hau, aus meina Hendd und höfds ma!!!“ D’Leid haum åwa gmoad, das des iagand wås fon Deifi is, haum a Greids gmåchd und san dafau g’rend. Und da Giarigi, jå, dea schreid und woad heid nu a de Wäuda fo Seewoia. I kau nua sågn, höfds eam, wauns eam amoi dreffds, wei ea g’wöd se iads schau laung g’nua.

Schörfling und Seewalchen

S’is dswischen Schdoadåf und Gaumbban g’wen, då håd da Deifi in ana Gruam g’hausd. Und waun oana bei dera Gruam fabeigaunga is, daun is da Deifi aussag’hubbfd und håd eam a d’Gruab einigloggd. Und då håd a daun drinbleim miassn, bis das da easchde Giggal a da Gegnd g’schrian håd.

Ǻwa es kunnd a sei, das hoid so laung dauad håd, bis se dea den Rausch ausg’schlåfn håd. Und da Deifi håd hoid heahoidn missn ois Ausred.

Koa rechde Ausred, woarum d’Kabän wega woa, haum de Leid dswischn Schdoadåf und Seewoia g’håd. Wia g’sågd, af da Fleischhåggawisn is amoi a Kabän g’schdaundn. Und iadsd is hoid amoi so g’wen, das laung ned g’regnd håd und de gaundsn Såchan af de Föda hoid schau rechd diarr g’wen han. D’Leid haum bedd und g’obbfad wia nua wås, åwa g’nuddsd håds niggs. Da Heagod håd se ned daboama låssn. Koan Schbriddsa håds dau af d’Fäda und ois is eana fadechd. Då han d’Leid åwa bes woan und haum g’harabd middn Heagod. G’schimbbfd haums af eam, das a rechde Freid woa. Und wias ausg’schimbbfd g’håd haun, då haums dson Beddn dson Deifi aug’fånga. „Heagod, waun du nimma kaunsd oda wüssd, daun mua ins hoid da Deifi häffm, wei a so kauns ned weidage!“ Kaum haums fechdi bedd g’håd, da håds an Duscha dau und bliddsd håds und da Wind håd blåsn, das d’Wendd g’wågid haum. Und daun håds d’Eadn afgrissn, s’Feir is affag’schossn und da Deifi håd mid an Låcha d’Kabän und d’Leid drin a d’Hö åwigrissn.

Es is a a amoi so gwen, das a Baur um Middanåchd an Woid umanaundgrend is. Wiaso des so gwen is, des woas koana mea. Af jedn Foi is af oa Moi a gråssa, grau-schwåchdsa Hund nem eam heagrennd. Es miassds wissn, das da Deifi fria gern ois a Hund daheakema is. Da Baur håd se åwa ned draud, das a an Hund fajågad. Ea håd jå schau gwissd, das des da Deifi sei mua. Und damid da Deifi ned eagalig wiad, håd da Baur gands hoamig dson beddn augfaungf. Und wia da Baur ausn Woid aussikema is, då is da Hund af oa Moi weg g’wen.

A aunas Moi håd a Baur fo Seewoia an Woid a Jamman und a Schree g’head und håd g’moad, das då wea a Hüf brauchad. Inddan Rena håd a nu g’schrian: „Wås is los? Kau i da häffm?“ Und glei håd oana dsrugg gschrian: „I dad da schau häffm, wauns du an Dswüggi ned mid hedads.“ Då håd da Baur g’wissd, das eam des Schdüggi Bråd a da Dåschn foan Deifi g’redd håd.

Da Deifi håds åwa d’Seewoia ned nua an Woid brobiad, sundan a middn af da Schdråssn. Rechd g’freid håd se a Baur, wira af oamoi sim schwoadse Ros dahearena håd g’segn. Wiras åwa eifaunga woid, sands af oamoi iwa fufdsg g’wen. Und a Mau mid ana rådn Giggalfedan afm Huad is dso eam heakhema und håd gmoad, wauna sein Naum dåda a des Biachi dåda eidrågn dadad, daun kunnd a se des schensde Ressal aussucha. Då is an Mau g’schossn, mid wenas ds’doa håm kindd und is schnä hoamgrennd… und da Deifi mid seine Ressa hinddndrei!

Attersee 1974

Mei Uagrosfåda håd dswoa oiwei g’sågd, das a af Kemading foin mechd, waun ar amoi ausn Baradis aussifoin soid, åwa so baradisisch is ds Kemading ned oiwei, wei an Windda, då sausd efda s’wüde Gjågad iwan Hausberi åwa und måchd a da Nåchd an rechdn Wüawi, wauns iwa d’Föda und iwa d’Weuda duach d’Finsdan driwajågd. Då is daun dsuagaunga a da Lufd iwa Kemading, ois wia waun d’Hö los g’wen wa.

Und d’Hundd fo da gaundsn Gmeiddi, de haum des schau fü fria g’rocha, das s’wüde Gjågad kimmd und haum augfaungd dson winsln und dson bön, das a Wüawi g’wen is ois wia da wö. Und wauns gaunga is, daun sans aussig’schossn bei da Dia und han midn wüdn Gjågad mid, af Seewoia eine und åwi bis af Rudddsnmoos, wo se s’wüde Gjågad daun a de Weuda faluan håd. Ǻwa g’head håd ma’s nu laung.

Und wia amoi so a wüds Gjågad iwa Kemading driwabfiffm is, då is da Mosa an Gneui, a glona Baur, nu draussn g’wen. Ea håd dsuag’schaud, wia des gaunddse G’jågad bei eam fabei is. Und wira nu so schaud, då schded af oamoi a gauns a schwoaddses Ros foa eam und håd eam ned weidalåssn. Då håd da Mosa s’Dsügi gnuma und woidd se mid de Wuadd „Af ged’s, in Gods Naum“ afs Ros affischwinga. Ǻwa nu a den Momendd is a af an Scheahafn g’legn und s’Ros is bein Deifi g’wen. Dabei hed se da Mosa nedda em afn Bodn legn miassn, wira g’segn håd, das des wüde G‘jågad af eam dsuakimd.

Mondnacht 1954

Fasungane Kabän gibds a boa rund uman Addasee, åwa nua oane, de wås direggd an See fasunga is. Es is a gloane Fischakabön g’wen, de wås an heilign Niggolaus gweichd g’wen is. Und de oidn Fischa fadsön se, das se, wauns indda da Mess afn See draussn woan, fo indd affa s’Beddn und s’Leiddn fo deara Kira fo de Walla, des san de Leid, de wås an herowan Deu fon See wonan, g’head haum. Und wea fria an Sundåg af oan fo de Berign afigraggsl is, dea håds a efda g’head, wias fon See aussa g’leidd håd. Ǻwa heid is a d’Wöd am Addasee so laud woan, das scho laung koa Fischa und koa Berigraggsla s’Leiddn und s’Beddn ausn See aussa g’head hed.

De unddaiadischn Gang
Fon Aubon am See bis as Weissnbåchdoi eini is amoi a unddaiadischa Gaung g’wen. Und a afn Buachberi affi soid amoi a so a Gaung g’wen sei.

Burggrabenklamm 1952

De G’schichd mid da Niggsn, de wås amoi an See drinan g’lebd håd, de is schau gauns oid. De Niggsn håd Adhara g’hoassn und is ses rechd guad g’schdaundn mid de Leid rund uman See. Oiwei, wauns oana brauchd håd, håds eam a wengana Goid oda a boa weaddfoi Schdoana dsuag’schdeggd. Und so han de gaundsn Leid rund uman See hoid dso wås kema. Ǻwa midn guadn Leem is hoid a da Neid und de Gia kema. Und des håd a da Niggsn hoid goa ned g’foin und so is åfd faschwundn. Iadsd hüfd a de Leid koana mea, wauns eana dreggad ged, åwa da Neid und de Gia san hoid nu oiwei då. Ǻwa a wengal wås håd de Adhara daun schau dålåssn. So wia da See leichd und glaundsd, des håd a fo da Niggsn. Und weng den Leichddn und Glaunddsn keman hoid do oiwei wida Leid und låssn a wenig wås fo ean Gäd und Goid am See då. Und d’Leid uman See haum d’Niggsn a ned gauns fagessn. De oan sågn, se lebd heid nu an Weissnbåchdoi drinan hinddan Niggsnfoi und de aunan haum a da Adhara a Denggmoi g’sedsd, des wås ds Kammal schded. Då schded daun draf:

Gold, Silber und Geschmeid schenkte Adhara die Nixe in vergangener Zeit,
des Menschen Missgunst und Neid verwirkten der Nixe Freigiebigkeit.
Seiher streut sie in den Attersee Reichtum, Gold, Silber und Geschmeid.

Attersee 1932

Min grisdlig sei haums a fria ned oi so g’håd am See. Und so is hoid kema, das drei Baun bei oana Wiadding dsaumg’sessn san und min Ǻllaheiligsdn, mid da Kommunion, a Gaudi g’måchd haum. D’Wiadding håd de drei Mauna mid Wuaschdraln „åh’g’schbeisd“. Ǻwa kaum håds mid den aug’faunga, då hans olle midanaund schau dåg’legn afm Bon und haum se nima rian kina. Iadsd håd ma åwa koana fadsöd, wia de G’schichd weidagaunga is, åwa se wean se schau wida amoi rian haum kina.

Attersee 1907

In an Baunhaus iagndwo uman See, då han amoi d’Mauna af d’Nåchd beinaundag’huggd und haum hoid a weng koaddld. Und wias hoid so bein Koaddnschbün dsuaged, haums g’rauddsd, g’schimbbfd und g’fluachd. Und wias so rechd g’miadli woa, is af oamoi de Dia afgaunga und a Mau is einakema und håd g’frågd, ob a ned då an Haus schlåffm kinad. Es is koana dagegn g’wen und d’Mauna haumdn a glei dson midschbün eiglånd. Des Bledi woa nedda, das dea Dsuagroasde a jeds Schbü gwuna håd. Und wei so wås ned rechd lusdi is, haums hoid daun boid afghead dson koaddln und haum se nidag’legd. Da Fremde håd a an Blåds dson Schlåffn griagd und boid is an gaundsn Haus a Rua g’wen. Nedda um Middanåchd håds af oamoi an rechdn Rumbbia dau, åwa wia ma a Liachd g’måchd håd, des håd a weng dauad, is ois wida ruig g’wen. Koana håd so rechd g’wissd, wohea dea Rumbbia kema is.

An neggsdn Dåg han oi rund uman Disch bei da Subbm g’sessn und haum aus da Schissl a da Middn aussaglöffid. A Gschia fia jedn aloa håds jå fria nu ned gem, des is easd mid de Fremdn nån Griag kema, wei då haums se de Insan a weng grausd, wauns mid de Dafaug‘renndn, de jå koana so rechd kennd håd, aus oana Schissl haum essn miassn. Iadsd haums eana hoid an jedn an Dälla hig’schdöd.

Af jedn Foi haum oi midanaund nu d’Subbm aus oana Schissl g’essn, då is da Beirin a Schdiggi Bråd inddan Disch eini g’foin. Und wia se se so buggd um des Schdiggal Bråd, da siagds, das da Fremde Goasfiass håd. Då is ia a „Mariandjosef“ auskema und sofuadd håds a Greids g’måchd. Und schau is da Fremde mid de Goasfiss a scho weg g’wen.

Des is åwa ned des oandsigi Moi g’wen, das da Deifi am See fabei g’schaud håd. Wead eam hoid g’foin håm bei ins, wei a oiwei wida kema is.

Und so fadsöd ma se, das de Baun fo weida hinddn amoi dson Eisschdogschiassn dson dsuagfroana See kema han. Und wias a so dsuaged bei sechane Såchan, håd oana oiwei faloan. Des hådn a so geagad, das a dson schrei und fluacha aug’faunga håd. Gauns damisch is a woan. Und wira so umadumschreid und se goa ned beruign kau und wü, då haums af oamoi an Schdogg dsfü afm Eis g’håd. Und wia de Baun fo de Berign nu driwa nåchdenggd haum, wo den dea Schdog af oamoi heakema kau middn afm See, då is af oamoi, so mia niggs, dia niggs, a schwoaddsa Hund dåg’schdaundn. Und hindda den Schwoadsn Hund a Fremda, deas g’frågd håd ob a denn ned a weng midschbünd deafad. De Baun haum e nu oan brauchd af a Moaschåfd und so haums niggs dagegn g’håd. Ǻwa wia da Fremde daun oiwei g’wunga håd, da is eana daun schau a wenig ds bled g’wen. Oan Baur is des gaunddse ned gauns rechd fiakema. Ea håd se dengd, kau jå niggs schådn, waun i amoi a Greiddsal måch. Und a den Momendd, wo a se begreidsigd håd, san da Fremde, sei schwoaddsa Hund und da Schdog a schau weg g’wen. Nedda nå Schwöfi håds g’schdunga, das a de Baun grausd håd. Ǻwa då haums oi midanaunda schau g’wissd, mid wens Eisschdogschiassn am See dau haum.

Wia g’sågd, de Baun han oi midanaund nu amoi dafau kema. An oidn Weiwal a da Buagau håds ned a so g’rådn. Ia håd duadn a Buag g’head und d’Leid haum se rechd g’fiachd foa ia, weis a so a oidi Bisguan g’wen sei soid. Oi haum fo ia nua fon „besn Weiwi“ g’redd. Und dso dea is hoid amoi da Deifi kema und håds midg’numa. Ea håds båggd bein Grawadl und håds mid ad’Lufd g’rissn. Ea woidd mid den Weiwi iwa D’Dråchnwaund. Da Deifi håd se åwa a weng fadau. Enddweda se is eam ds schwa g’wen, des Luada, oda ea håd ned gnua Schwung g’håd. Af jedn Foi is da Deifi mid dea Bisguan geng d’Waund deifid. Und da des a so g’wen is, kau ma heid nu segn, wei heid håd de Dråchnwaund bei Mansee nu imma a Lo, wo d’Leid sågn, des is s’Deifilo.

Ǻwa da Deifi kau ned nua s’fliagn, da Deifi kau a schwimma. Fria is ofd so g’wen, das da See rechd saggrisch håe Wän g’måchd håd, obwoi koa Lifdal ned gaunga is. Då haum d’Leid rund umman See sofuad g’wissd, des måchd da Deifi.

Und a da Nåchd is rund uman See a ned so. Wea genau schaud, der siagd ofd a da Nåchd Liachdl brena obwoi duad iwahaubd koa Haus ned schded. Des san de faluanan Sän. Und wea se mid denan schbüd und se fuggsd, den bringans a Ugligg.

Und den kaus schau amoi a so dage, wia den Baun, dea wås bein Aggan und iwahaubd oiwei g’fluachd håd wia nua wås. Und wira då oamoi so g’aggad und g’fluachd håd, da håd af oamoi iagand a Hendd, de ma ned g’segn håd, seini Oggsn afg’hoidn. Iadsd håd dea Baur, dea wås jå ned g’segn håd, da da Deifi seini Oggsn afhoidd, nu mea g’schrian und g’weaggd. Des håd se åwa da Heagod daun nimma g’foin låssn und da Baur håd fia nei Joa niggs mea ren kina.

Seewalchen 1953

Es is amoi a Baur am See g’wen, dea håd foisch g’schwoan. Und wira so g’schwoan håd, då is sei rechde Haund af da Büwe g’legn. Kaum håd a des ledsds Wuadd aussabråchd, då is sei Haund a schau gauns schwoadds woan. Und es håd ned laung dauchd, då is a iwa und iwa mid schwoaddsi Düwin foi g’wen. Und boid draf is a a schau dåd g’wen. Kaum haumsn eigråm g’had, då san a schau seine Leid graung woan und g’schdoam. Und boid draf san oi rund uman Addasee mid dera Graungad augschdeggd g’wen. Jå, so is d’Besd dson See kema.

Gauns fiachdalig is g’wen, wei es håd ned laung brauchd, då han schau oi rund uman See hi g’wen. Nedda ds’Unddarach håd a Maunaleid und ds’Weiregg a Weiwaleid iwalebd. De dswoa haum åwa niggs fonanaunda g’wissd. Wia de dswoa so iwan See g’schaud haum, da haums g’segn, das ds’Unddarach und ds’Weiregg wås rauggd. Und då haum oi dswoa gwissd, das dsumindasd nu oana iwablim is am See. Iadsd håd se s’Weiwaleid aus Weiregg und s’Maunaleid aus Unddarach as Draunal eineg’huggd und is iwan See ruadad. Und a da Middn haum se se droffn. Und g’freid haum se se. Und wias de G’schichd wü, sågd ma heid, das de gaundsn Leid rund uman See fo de dswoa hea keman.

Buchtipp: G’schichddn fon Addasee (Button: Literatur)

Unteerach um 2000

Laung, laung is hea, då is s’Eis aussagruna dswischn da Dsimnidds und de Berign fon Höllngebirge. Und des Eis is einegruna in de Gruam, wås heid da Addasee is. Und duad, wo s’Eis an See einigruna is, da håd da Nikuds g’wohnd. Des is da geamanische Schdromgodd g’wen. Rechd fü mea woas ma ned iwa eam. De Grisdn haum ausn Nikuds daun an Niggolaus gmåchd. Und da Niggolaus is jå a heid nu da Schuddsbaddron fo de Schiffa. Und afn Beri om ds’Weissnbå, då schded jå a heid nu a Niggolaus-Kira. Ǻwa fria, jå fira, då haum se då om d’Leid droffn, damids dson Nikuds, dson Wåssagodd beddn haum kina.

A aundane Gschichd sågd, das da See jå goa ned min Gleddscha gwoan is, sondan das duad, wo iadsd da See is, oamoi nedda a gloana Deich gwen is, dea dso oana Buag g’head håd. Und da Buaghea, des woa koa guada ned. Goa d’swüd håd a g’hausd und umgweaggd. Da Heagod håd den Gaundsn a Neichdal dsuagschaud und daun is eam ds’bled woan. Iads håd af oa Moi dea Deich dson iwage augfaunga und håd des gaundse bliade Laund iwaschwemmd. Jå, und so is hoid da See g’woan.

Buchtipp: G’schichddn fon Addasee (Button: Literatur)

Burgau um 2000